La mè poesia in lombard

Se 'l Stat el me proibiss de drogàm per el mè ben El gh'ha anca de devedàm de provà d'amor i pen Perchè se hoo provaa i storgion e m'han faa nagot Dopo quater ann de quela tosa lì el mè coeur l'è ancamò rot

Orloch che sarren su (6 november 2020)

Gh'è vorzuu propi poch Per passà di boni ai orloch Di pussee brai de l'Europa intrega A quej che disen che ògni libertà la se nega Quand che la curva l'éra bassa serom di bellee Quand che la se volza hem faa nunch el cuntee Disen che l'è colpa de quej che meten mal la mascherina Poeu lor gh'han el sistema pront domà per la gripa setembrina 'Dess, poeu, gh'è rivaa 'n mincion che 'l sa nanca sa l'è 'n lavorà Che n'ha dii de lavorà pu e che gh'hem de restà in cà E per pagànn di danee che per stàgh adree hem trasaa Ne darànn i freguj che quell che n'han tolt via e s'inn mangiaa E in del coeur mi a gh'hoo 'na Speranzina Che se dessedom e ghe fem fà la fin del Prina

Un problema d'amor che i omen gh'han (10 de november 2020)

Oh Signor, te fee debon? A mandàm una tosa che ghe piasen i donn? Con tut i rob che capità ne ponn, Voeuna che ghe pias pussee che a mi i monn?

El coronavirus n'ha mazzad 139 (14 de november 2020)

Pussee che de 'sto virus malnat Me se preocupi de 'sto govern de mat Che s'inn netaa 'l cu con la Costituzzion Han dii per la nòsta protezzion L'era bruta e la pareva quella di todesch de l'est Ma gh'hoo de dill, finna incoeu l'ha fonzionad, "effort best" E intant che 'l virus chines ne infetava Anca i maner del Winnie Pooh ghe rivava Voramai i at ministrativ se ciamen lesg E i ordenanz inn statut, l'è anca pesg In parlament gh'è di portavos che per defend l'Iseppon Disen di cagad degn di pesg mincion Compagn che 'l DPCM E 'l decret lesg inn midem E gh'è anca di giornalista che han miss la lengua in mezz de 'n poo de ciapp E intant ne disen che inn drée a mangià el scicolat

El simp (25 de november 2020)

El simp l'è vun che 'l trata ben i donn Ma che, debon, el voeur domà i sò broeugn Sa fann doperà compagn di patinn E diventen di tosann i sò nininn Domà fina che l'è possibel che sien un boeugg pel sò bigolin E quand che la se troeuva un alter me moros El taca a dì che tucc i donn inn schivios Però poeu el va in su l'internet A digh che tut i donn inn perfet Perché 'l voeur meteghel in di tett E 'l spera de trovànn voeuna che 'l mena in lett

El virus con l'orelogg (28 de november 2020)

Hii sentuu l'ultema news? El gh'ha l'orelogg, 'sto virus! L'ha dii luu, el minister de l'Autonomia Che me par che de biologia l'ha studiaa mia Per luu el Bambin el po nass anca do or prima Ma guai a tocà el sò belee de sarà ai des de la sira Che 'l par che 'l virus el vaga a or per colpìnn con la soa ira E sta gran mincionada besogna metela sgiò in rima

Metress, in del cuu, prest (2 de dicember 2020)

Gh'è di omen che fan 'na roba 'n poo mata Se preparen el busin cont una mota de pomada Volzen el cuu vers el ciel Zach! L'è in del bus Metress! Che bell! E mi me se domandi se 'l ghe fa no de mal Ma no, me disen, inn i gioij de fàll anal Ma mi al soo no debon se l'è bell Fàss picà in del bus del gnao un tarell

PER LE MISURE E RESTRIZIONI ESORBITANTI IMPOSTE DAL MINISTRO SPERANZINA NON SI PENSA PIÙ A PRODURRE (14 de dicember 2020)

'Dess che 'l negozzi della passerina L'è semper sarraa per la Merlin E vun che 'l cazz no 'l se mena El gh'ha de andà fina in Tesin Col granee voeuj, con sucia la cantina Col virus che ne tira in coo la pell vorav vedè, 'sto decret, giuradina! che fuss in cas de fànn pagà no i gabell E anche s'el fuss in cas de fànn stà in pee vorav vedè coluu che po pagàlla Senza vin, senza gran, senza danee Me despias per violter produtiv Che per mi la mè busta poss ciapàlla A dispett del sur Speranzina e di sò imperativ

El fioca! (28 de dicember 2020)

Fioca, fioca! El bianch no 'l moca Inn quataa i strad Zero inn i grad Vedi i fiolit che se tiren i bolgiet I mam che dann de mat per tegnì net Un quaj alber l'è borlaa sgiò E i Ghisa me fann passà no Vedi el campanin de la Gesa Noeuva pien de nev Un quaj vègg foeu del bar che 'l vin cald el bev Intant che lu el finiss el sò bicer Mi voo a proved del becher La sira poeu voo sgiò a godèmm la pas Ma voraria havègh no inscì ross el nas

Poemet didascalegh: inferna del governo (7 de sginer 2021)

Sta nocc el m'è vegnuu in sogn el Bonvesin E 'l m'ha cuntaa del governo italian la fin Che per i so robb del cazz A sarann castigaa col contrapass El prim a rivà el sarà l'Isep Cont Lu, capo de la regenza El sarà mandaa in su 'n mont Senza pu nient sota la soa dirigenza Poeu rivarann i minister a cinch stell El sò castigh forsi l'è pussee bell A vegnarann castigaa per ignavia La serenità la gh'avarann mia Poeu riven i minister del PD Che inn staa renegaa anca del Dee El prim l'è 'l sur Guerin L'ha parlaa de responsabilità e l'ha lavoraa benin El gh'havarà manch de castigh e de pen Ma per i alter el va no inscì ben El riva poeu el sur Franzeschin Che l'è staa propi piscinin Che 'l gh'ha di tendenz de tirann E 'l sarà inscì el castigh che ghe darann El gh'havarà una bella cà in tranquillità E i diavol ogni di el sò domicili i violarà Poeu el gh'è 'l sur Boccia Che 'l gh'ha pagura de tuscoss El vegnarà seguii di virus propi gross E 'l podarà refugiàss domà in Lombardia E la De Micheli, ministra di straport Che l'ha faa propi nagot La meten su 'na vintot Che poeu la se impieniss de mort Per tucc i alter el castigh l'è deciduu E tucc i speranz inn perduu Gh'avarann de stà al Consili di Minister E decretà di midem robb per semper El riva poeu el pussee gram de tucc i ann Tut el sò operaa l'è staa un dann L'è 'l sur Robert Speranza Per luu nient de perdonanza El sarà castigaa in tri maner per tut quell che l'ha faa fina jer El vegnarà mituu in l'oeuli giald poeu in del magma naranz e cald poeu in del foeugh ross cont i so son per castigàll del modell a zonn Poeu per castigàll de l'ora de polizzia Quej che hann sarraa su el quatarann con la mercanzia E desgià che in toscan disen che n'ha quataa el foeugh el vegnarà anca brusaa di voramai fallii coeugh E per el so eror el pussee grand Ciovè governà senza avè mai lavoraa El sarà castigaa in tut i band E per semper tucc i or i prej el s'ceparà Poeu speciavom quej de Italia Viva Ma l'è strano, perchè inn no rivaa A la fin el Signor el disiva Che hann falaa per omission e donca inn perdonaa Ma anca in Paradis el so castigh ghe sarà 'me tucc Desgià che hann faa borlà no el governo Finissarann magara no a l'inferno Ma ogni nogg borlarann sgiò del lecc

In regord del sur Palach (17 de sginer 2021)

Cinquanta e du agn inn passaa A brusà la primavera inn rivaa I Ross, de Mosca, contra la libertà Ma la soa fiama semper brusarà Grazzia a 'l coragg del giovin Jan Quej 'me luu la trama al velluu dann

La Lombardia l'è straca di scern del sur potenza e la s'incaga (21 de sginer 2021)

Oh cara el mè minister potenza Che bell vedè i botegh vert I bar che me fann bev dent I lombard che s'inrabissen col so deliri de onnipotenza Fa festa, robertin, che l'è passada la fiducia al Parlament Nient de lavorà per ti, almen prossimament Tant, anca se vorii no, nunch eletor somar lavorom Per pagà i voster sussidi, boneman e rob trason

A 'n poeta meneghin senza savell (23 de sginer 2021)

Havevi fornii 'n esamin E scernissi de fermàm in Gorin A setàm in sui panchinn propi arent a 'n poeta meneghin Al savevi no car sur Cazzetta Che te seret inscì arent 'ndo che mi voo a mangià la pizzetta ma 'dess che 'l soo a son content

El governo forbes l'è mej de quell tecnegh (2 de fevrer 2021)

El nost Pajes el gh'ha pussee che 'n problemin E la soluzzion la se ciama Pajarin La va ben no 'na terapia omeopatega Perchè 'l Draghi no ne medega Tajà la spesa, fà 'l federalismo L'è la cura per l'assistenzialismo Tut el rest l'è paj medegozz Che voeulen stà 'n sul scagn cont on bell mes'ciozz

BOSINADA IN SUL STAT D'ITALIA A FEVREE 2021 (2 de fevrer 2021)

Serom dree a noeudà in d'on mar de merda A specià 'n poo de cartamoneda verda E poeu el riva el Renz cont el so partii A dìnn "a cagà, cara i me amis, 'ndii" L'ha faa andà via la Bellanova e la Bonetti E quej de destra giamò vedeven premier el Giorgetti Ma poeu inn andaa al Senat per la votazzion E, giuradina, l'è rivada la salvazzion I hann ciamaa per nom al banch I vot infin pareven manch Ma l'è rivaa a salvàj pal coll El bon senator Ciampoll Però l'è crisi istess Perchè senza Renzi se fa nagot Ma el fiorentin el vœur propi el MES E donca se fa i ciciarad de not El Cont el se troeuva al Palazzi El spera in d'on mugg de Grazzi Ma i numer inn ciar, l'è bella! E donca el mandaa l'è in di man del Mattarella Ma el riva el sur Figh de la Cambra di Deputaa Ch'al ciama l'interlocuzzion Ma, purtorp per luu la va maa E i va a ramengh i consultazzion Inscì el sur dotor emintentissem President Inrabii 'me 'na bissa con foeura i dent El nonzia che se giuga pu al Verzee di Senator E che 'l darà l'incaregh al Draghi governator

El mè pensee (14 de fevrer 2021)

El mè pensee incoeu te se' ti L'unega bona de completà mi Insci, me pias stà con tì, me fa sentì ben Sa gh'hoo de dì, oltra che con tì 'l mè coeur el sarìa pien? Ah, giuradina, domà se 'l fuss 'n amor che 'l se po fà

EL PROBLEMA DI SOSTEGN (1 de avril 2021)

El problema di sostegn a l'è vun A l'è che 'l Stat de pagài no l'è bon Perchè i daner se fann a lavorà E se nissun lavora, nissun ja po pagà

El dì che defaultee (20 de avril 2021)

El dì che defaultee E che sarii in d'un gran cuntee El sarà un gran bell dì de festa Con la poca sgent de coo che la resta Perchè capissarii che con la speranza Se porta no in sul tavol la pitanza

El 6 de masg (6 de masg 2021)

Sur Radeschi che no 'l sbaré Contra di fradej mè Sur Radeschi che no ciamé l'artilieria Contra i sgent de Lombardia Lu l'ha tiraa no foeura i cannon E paj nost noni l'era anca bon Tant che el sur Feldmaresciall a Milan viv, l'ha poduu fàll Poeu la scerna l'hem fada mia tant benon La scerna quella del boja che ne scanna E 'l 6 de masg gh'è rivaa 'l Bava Beccaris coj cannon E hem pagaa la scerna de 'na patria putanna

A la pizzaria napolitana (4 de setember 2021)

A la pizzaria napolitana Setaa 'n su 'n tavolin de la Circumvesuviana A gh'è 'n vigg ratos Che debon el parla arios A gh'è 'n sgioven che 'l mangia cont el pedrioeu Perchè, 'dess el soo, lu l'è 'l pizzaroeu El me fa 'na pizza con la bufala sora L'éra de tant che la mangiavi no, l'era ora E intant che doperi el cortell A pensi a quella poesia chi De metegh dent un para de neologism bell E a un bell disnà teron come me pias a mi

I du amis (14 de setember 2021)

A l'eren propi fiss A eren di grand amis Lu l'ha faa 'l mincion E lee l'ha dii basta, de bon Ma gh'è rivaa la tempesta E lu 'l torna, forsi el resta Perchè quand che du se voeuren ben Se po partì la strada, ma no quand che gh'è i pen

SIRA DE TEMPESTA (18 setember 2021)

A gh'è foeura tempesta La par 'n aria foresta Ogni tant, gh'è di tron El pioeuv tra poch, de bon! Vem inanz mi e ti Ma poeu la riva la pioeuva Rivom no a cà, disi mi E se scondom, no la voeuri bagnava Sem sota 'n baltreschin El trona e te gh'hee pagura Mi te tegni 'n poo i manin Te brasci su? De sigura! Per un poo se ferma el temporal Fem in temp a tornà a cà E te me diset de restà Perché te gh'hee la tema de 'sto temp seral E te se cavet i scarp per entrà dent Insci te vedi i pescit, ma fa nient Se metom insema in su l'otoman E adess podi tegnìt per man Ghe riva 'na sajeta che la fa smorzà tuscoss Te se brascet pussee e te cridet baloss Mi te doo subit 'n basin 'n su la front Ma te voeuret pussee e riva al pont Te me vardet fort in di oeugg I to pupill me paren un boeugg Te me ciapet la testa e me baset i laver Madoj, alora, l'amor l'è ver!

AL SUR UMBERT BOSS IN OCASION DEL SO VOTANTESIM ANNIVERSARI (19 de setember 2021)

Cara el me Umbert padan Voramai te gh'hee votant'agn! Se sem chi a parlà de Lombardia A l'è staa grazzia a la toa magia Ma purtrop a podi nò dìtt robb bon Perchè voramai la Liga l'è 'na roba de mincion Nissun che ne difend, nunch de l'Altitalia Vint agn de lota, trasaa e butaa per aria Voramai el governo l'è 'n mes'ciozz assistenzialista Tucc che voeuren pussee svanzigh de sbat via Nissun che ne parla de mestee federalista Ma domà de roba che pagarà la Lombardia E nissun chinscì l'è bon de fà 'n quajcoss Perchè voramai sem un popol de baloss Che parlom domà de pass verd, de buson e de negher E quand che ne 'l meten in del cu disom alegher! E me despias Umbert che hem perduu la Lombardia Ma forsi la colpa l'è anca toa e 'n poo mia Perché, a bon cunt, hem mìnga parlaa ben ai coeur E adess, bella roba, la terra nosta la moeur!

IN OCASION DI ELEZZION MINISTRATIV DEL 3 E 4 DE OTOVER 2021 (25 setember 2021)

Oh bej, se vota per el Sur Dotor Eminentissem Sindegh de Milan, soa Santità Che per i cinch agn che vegnen divinament ne governerà E anca paj president di noeuv Circoscrizzion Ciamaa Municipi in la soa modernizazzion Prima a gh'è Soa Maestà Don Sala sindegh sortent Che l'è pront a governà ancamò, tut content La metropolitana la rivarà fina a Ciass E con luu pagarem pu de tass A sostegnìll i Verzee de Gratasoeuj e de Nosee Oh madoj, a votàll quante idee De quej che voeuren privatizà anca la polizzia A quej che voreven comissarià la Lombardia Poeu a gh'è el Prof. Com. Duca Bernardo di Fraa Che nissun l'ha capii indova che l'hann trovaa Con luu el tram ghe rivarà fina a Oflaga E 'l comun per nunch i tass el paga A sostegnìll inveci el mercaa del pess de l'Ortiga Hann risiaa per mes Forza Italia e la Liga La Melon l'ha scircaa Milan su la cartina E poeu l'ha tiraa foeura el dotor Feltri de la cantina Poeu gh'è quell del Moviment di Cinch Stell Che ja vota nissun, porell Hoo savuu adess che l'è 'na dona A speri che per havélla ciamada om la me perdona Poeu gh'è i vari comunista Che vann in dodes perchè fann no la lista Perchè ghe pias pussee sta a fà rebellot In su chi l'è pussee brao in tra Lenin e Pol Pot Tucc voeuren fànn lavorà 'me statai E tuscoss l'è colpa di liberai Ma sgiamò el sur Turaa ne cuntava in Parlament Che a viv de lavorà publegh se finiss cont un tarell in del cuu, patent Poeu gh'è el Sur On. Ing. Paragon Sostegnuu di italianista e di padanon El dis de no a la certifegazzion verda Ma forsi si a la bandera verda? Con luu a Milan ghe sarà i strad dor E ogni citadin el vivrà in tra i fior La 58 la rivarà fina a Lubiana Ma foeura de l'UE, donca con la dovana A gh'è poeu i socialista Che vann coi liberai Che ghe pias di treni el via vai E voeur dervì i Navili, pista! A gh'è poeu el partii gay Che 'l vœur Milan pien de sghei Ne vœur fà tornà Mitteleuropa E magara torna Radetzky, pota! Poeu gh'è quej che scomincen inscì Guidaa del Rag. Avv. Cav. Biavasch Che me paren anca inscì inscì Ma chi ja cognoss? El sarà un fiasch Infin, a gh'è quej che disen no al vacin E nanca al 5G e al bancomat Al soo no mi, ma a la fin Me paren propi domà di mat! E mi me se domandi cossa hem fad de maa Per vedé 'sti elezzion in la capital de Lombardia Che domà per scriv quella roba chì Hoo dovuu vardà in su la Wikipedia

IN MORT DEL CENTER-DESTRA MENEGHIN E DEL SO CANDIDAA (5 de otover 2021)

Gh'è mort el center-destra meneghin E 'l so candidaa, el dotor di fiolin El Salvin gh'ha miss la facia, ma a bon cunt el bus del cuu Che forsi l'è anca istess, disaria, per luu In di municipi la sinistra l'ha faa 'l pienon Noeuv su noeuv, oh, hann vensgiuu debon! El Bernard el gh'havarà anca la pistola Ma forsi l'era mej 'na candidatura manch molla Per furtuna i listarell pussee estremista Col so 3% poch hann faa E me fann pensa che gh'è an'mò di socialista Che inn compagn del so pader, el Turaa A la fin Milan l'è 'n pajes de lavorà E per lor inveci prodù a l'è malfà Eren quej del sarrà tuscoss per la pandemia In la speranza che ne pagass tuscoss l'Europa Unìa E adess specciarem alter cinch agn Per vedé se la politega la farà de dagn Ma soratut per vedé se per el nost Milan De Belleri on quajvun de bon cagarànn

Oh Patria mia (11 de otover 2021)

Traduzzion de l'inn de la Cechia in lombard: Oh Patria mia 'ndo che te see? In di fium e in di noster praa In di piant a fianch di riaa In tra i fior de primavera El nost Paradis in terra Quella chì l'è terra de Boemia La Boemia, la mè cà La Boemia, la mè cà

Pensee politegh (18 de otover 2021)

l'Italia l'è compagna de 'na pesta Che in sui loeuv la riva 'me tempesta Ne dis che ne regoeuj pu la sgent foresta Ma poeu ne lassa domà quell poch che resta Lavoree pussee o gh'hii no de coeur Fina che la vosta terra la moeur Perchè la politega pussee de roba la voeur Ma quand che un parassita el mangia e 'l bev senza ritegn El capita despess che 'l resta senza regn E vedé l'Italia che la moeur per ingordigia Ne fa stà ben a nunch, sgent che coj danee l'è ligia E forsi se la pesta la desmet de ciuciànn el sangh e la va via Ghe sarà 'na quaj speranza per la Lombardia Ma domà se sem deventaa no compagn de lor E se l'è inscì, purtrop, ghe sarà pu nanca 'na fior

A la fasan di noni (25 de otover 2021)

On bell biccer de broeud in fin d'un past A l'è tutt quell che ghe voeur per met fin ai fast Per dàgh màn forta al stomegh se 'l gh'ha necessità E jutà el fidegh se la fel l'è no assee a bastà

Versetti feltrianici (29 de otover 2021)

Ah 'me che 'l saria bell 'sto mond Se i sgent pensassen ai sò rob Inveci de pensà se vun ghe pias el bigol o i donn Ma mi me se domandi, Osti, che problema gh'è se vun a l'è buson? Ve toeu via a violter la libertà de ciollà i monn? No? E alora, andii a cagà! Che vun ghe piasa la brugna o el pirlon Basta che 'l me romp no a mì i cojon!

NOCC DE HALLOWEEN (1 de november 2021)

Nocc de Halloween, paj noni l'è Aulin Ghe riven a sonà al campanell i fiolin Che voeuren dolz e caramell Coi color e i savor pussee bell A gh'è di badee che ne rughen i ball E ne disen che che gh'hem no de festegiàll Perchè ghe pias al Diavol e ai american Al sann no che l'éra sgiamò di nost av pagan? Me se regordi l'ann passaa, vestìa de strìa Col to bell visin e che do tett T'hee fa 'l sorris e m'hee daa 'n quaj dolzet Ma 'l mè pirla l'hann vist indepertut in Lombardia Ma nient, cossa gh'hoo de fà Oltra a sperà che riva poch de sgent Inscì me se podi mangià i dolz e dì nient Se mi paj donn a son malfà

POEMA EPICH MALNAT (1 de november 2021)

Tucc i omen per viv e fà Gh'hann de havégh quater estremità Do man de sora per scriv e mangià E dò pè de sota, per corr e caminà Semper curaa inn i man Col smalt e la crema, me regorden el toscan Tucc ja veden e ghe dann vant e onor Se inn net, imprenditor, se inn voncc, gran lavorator Inveci i pè inn semper sconduu Me regorden el lombard, de rari scrivuu Domà de fa vidé in l'intimità E mai se gh'è de la formalità Gh'è 'n quajvun che ghe piasen, Ma per tancc inn di malaa Gh'è quej che ghe mangen Ma l'è propi 'na rarità E dònca, sa fem? Se tajom i pè e parlom pu dialet! Ma poeu se rendom cunt Che caminom pu e vivom in let! Inscì 'me per i omen no l'è assee avègh un para de estremità L'è no assee l'italian per la nòsta società Anca se 'l lombard ne someja no inscì bell de vidé A l'è mej tegnìll per finì no in d'un gran cuntee...

A S.M. EMINENZA ARCIVESCOV IN SUL STAT DE LA PIEV DI MÈ BALL (6 de november 2021)

Oh eminentissem dotor Arcivescov soa Maestà Quella Piev chi l'è domà malfà A gh'è 'l sur dotor ingegner Curaa Che tut el temp el passa a ciollà I monegh inveci de stàgh adree ai povarit Caghen in la menestra di por fiolit Hoo provaa a parlànn col catechista Ma l'hoo becaa al circolin di feticista Gh'hoo ciamaa el sur Diàcon Michelazz El m'ha dii che 'l se resentarà el cazz Gh'hoo mandaa un telegrama a Soa Grazzia Monsignor Ma 'l m'ha dii che l'è no 'n problema so de lor Sont andaa in pellegrinagg de Soa Altezza el sur Prevost Ma l'è in ferie a Tenerife fina a fina avost Gh'hoo ciamaa al Nonzi Apostolegh de dighel al Pontefice Ma 'l m'ha dii che lu ghe pias pussee la frice E donca sur dotor magistral Arcivescov gh'hoo de domandà jut a lu Perchè sedenò chinscì, Orco diavol, ne vegnom foeura pu

AL POETA PUSSEE GRAND DE LOMBARDIA FRAA BONVESIN DE LA RIVA (8 de november 2021)

Ode a lu, nost gran Poeta meneghin Autor di gran paroll in lombard e in latin Desmila vers lissandrit in del volgar del mi E 'n altra fraca in la lengua del Zeser e Polemi N'ha cuntaa la gloria de Milan E i maravej de Lombardia I perl pussee bell che ghe sia Che 'l Signor n'ha daa in man L'ha parlaa de la vita e de la mort De l'inferna del pecaa e del tort Del paradis di bon e di orator E de la passion de Nost Signor N'ha spiegaa anca el fonzionà de scola E la manera pussee bòna de stà in tavola N'ha parlaa di rebellot de la cità ambrosiana E de la vita de la Maria Madona Lu l'è medaja in sul pecc de Lombardia E l'è maester de quell che l'è Milan Gram se 'l desmenteghen el futur el sia Che pianta gh'è, senza di radis san?

IN SU LA VITA DEL SUR GENNARO ESPOSITO, CONTRIBUENT IN LOMBARDIA (8 novembre 2021)

De la stazzion l'è rivaa trent'agn fa El parlava poch de italian, e 'l lombard malfà L'ha trovaa de lavorà a l'osteria E de viv in del rud de Lombardia Ghe mancava la soa terra e 'l viv di campan L'ha trovaa 'n popol fregg, ma pront a slongà 'na man L'ha trovaa 'na bona cà e di bon vesin E l'ha tacaa a studià an'mò e l'è andaa benin E inscì de jut-coeugh l'è deventaa chef E nanca temp de pensà che pef! L'è deventaa proprietari del postesin E l'ha vist i problema di meneghin L'ha vist pagà tass su tass per havégh poch e nient L'ha vist i scoeul a tochèi e i ospedaa assent I strad con pussee boeugg che marciapè E la burocrazzia che l'è 'n bell cuntee Un bell di l'ha lensgiuu in su la gazzeta del residov fiscal E l'ha capii de havéghen pien i ball L'ha capii de voré anca luu la secession Compagn de tancc Fumagaj e Castion

EL PROFESSOR D'ITALIA (13 de november 2021)

El professor d'Italia de lavorà l'è minga bon Ma l'ha passaa el concorson, l'ha passaa el concorson El professor d'Italia nanca de insegnà l'è inscì bon Ma el gh'ha la catedra per el concorson L'entra in class e 'l proclama a vosà fort "Mi fussi lo prof Rossi e chi no mi scolta è mort" Ma poeu el rid fort e 'l dis che l'è per ridarella E ne comanda de sortì i liber de la cartella Ne insegna che 'l tricolor el riva de la pizza Margherita E che Hammurabi l'era in la milizzia de Napoleon Che benvegnuu in ingles se dis 'me in lengua tognita E che 'l binari in codes decimal l'è domà 'na conversion E quand che se lamentom a Soa Maestà la Dirigenta Lee ne dis che lu 'l gh'ha 'l sindacaa e nunch stem domà a vidé E donca cont i loment el cu la se resenta E poeu ne met in castigh a sò piesé E quand che 'l Prof d'Italia ne parla de politega El gh'ha semper de dì ben a tucc la soa carega E quand che 'l gh'è denanz un prof de l'università El capiss nagot e 'l taca a dì che l'è malfà El prof d'Italia el cred de vèss el bon Gesuu Che de podé educà a viv l'è bon domà luu Ma in verità a l'è propi un gran badee E a lassà i fioeu coi lov se faria men de cuntee

Inn de bataja tiroles (21 de november 2021)

(poesia scrivuda per un'ucronia, indova che di volontari lombard vann a sostegnì i BAS in del Tirol) Viva Kerschbaumer e viva Klotz Di nemis del Tirol inn el striozz El tarliss infin farann soltà Per la dolza dolza libertà La solta per ari la caserma El nost giurament se conferma Solten anca i segn d'ocupazzion L'è la strada per la liberazzion El dì del sacher coeur del Nost Gesù Al Tirol ghe disom che ne podom pu Pizzom el foeugh e i bomb in la nocc Oh tiroles, dervii i oeugg... Viva Kerschbaumer e viva Klotz Viva la lota e viva i BAS Onor ai marter e al Luis Amplatz Viva Kerschbaumer e viva el Tirol!

In su l'amor (27 de november 2021)

Vivi in del regord D'un amor che l'è mai staa Di tosann che domà gh'hoo parlaa Del mè coeur balord

Dusentquaranta e vun (29 de november 2021)

L'è nona de la nazzion lombarda Di sò reform sem el fior pussee bell 'n ha daa tancc cusin e 'n quaj fradell Pecaa che l'hem perduda per una patria bosarda

Tampon (30 dicember 2021)

Chi l'è causa del so maa Colpa soa

Baregg (18 de sginer 2022)

De Baregg hoo vist el center La Gesa, i strad e il del menter El mercaa rional de la soa sagra Piscina, bella ma 'n poo magra Un borgh bell e classegh de Lombardia Tanta gent che ghe viv, tancc che vann via L'è vesin a Milan per carità Ma tant lontan in la soa umiltà

DEL CONT ISEP PRINA EL 20 DE AVRIL 1814 (18 de sginer 2022)

Mi servitor fedel del me Paes Hoo perduu tusscoss in l'ultim mes A gh'è pu el mè Imperator Napoleon A gh'è 'l Kaiser, ma el popol no l'è bon Pien de tass, de gabell e de dazzi Mì gh'hoo de sperà in tancc de grazzi E lor vosen a mì, el minister Prina Che l'ora, l'ora la se svesina Serraa infin in d'ona botega La me mort el popol el medega? Inscì a voo foeura con coragg A fà la grama fin del servitor sagg Per i milanes l'è 'na fin bella Quella che foo mi con vert l'ombrella

A CERTI FORESTEE CHE SUTEN VEGNÌ A MILAN A SPARLÀNN (11 de fevrer 2022)

Dopo de 200 agn sem an'mo chì A parlà di istess robb, vedarii De sgent che scolza, pora e senza nient La suta a vegnì chi, a fà bella vita e a lomentàss de quell che sent Ah ne disen, ne curee mal E poeu a cà soa gh'hann nanca l'ospedal E lavoree trop, gh'havii no de vicinanza E poeu a cà soa viven de redit de citadinanza A Milan se mangia mal e se viv pesg Di robb bell de cà se po domà lensg Ma mai, mai che tornen indree E se liberen de 'sto Milan e vann foeura di pè Voeuren vegnì e comandà a cà nosta Senza nanca savè i regoll e senza ritegn Voeuren roba e danee senza sosta Tant che ne fann met el nòst futur in pegn V'hem faa grand, daa tusscoss E sii boni domà de parlà mal e de ingiurià 'sto gran Milan Saltee via, a la svelta, in d'un foss E tornee a mangià e a fà nient in sul vost otoman Sii d'Italia, purtrop, sem tucc con la stessa bandera Ma gh'è domà invidia, oeudi, rabia e nemisizzia In su la nazzion, a bon cunt, el Porta reson el gh'haveva A sii pien domà de roba grama e malizzia

Considerazzion politega (7 de marz 2022)

De la guerra a l'autonomia La vegnarà foeura la Gran Lombardia Se ne tachen e ne voeuren fà fò El sarà no assee a partìnn el Pò! Lombard del mont e del pian De Milan a Resg, de Bergom a San Giovann Coj fradej de Romagna e Venezzia Se dessedarann squasi fina a la Rezzia Se provee a tocà la sanità a Bologna Roma la finissarà... In la fogna!

No l'è perduda l'Ucraina (9 de marz 2022)

Traduzzion de l'inn de l'Ucraina No l'è perduda l'Ucraina Inscì libertà e gloria El destin el tornarà a sperà Per nunch, fradej ucrain I nemis se delenguarann Tant 'me fioca al Sol E anca nunch fradej governarem Liber in cà nosta Alma e corp per la nosta libertà Ghe mostrarem al mond Che nunch, fradej ucrain, Gh'hem sangu cosach

In sul licee per tucc (20 de sgiugn 2022)

Che poeu disi mi de bon Un pajes domà cont el licee El se met in d'un gran bell cuntee E 'l po andà ben domà a 'n quaj sapienton Se tirom foeura domà member del boulé E poeu restom senza master sitee Tucc espert de pensee materialista E poeu gh'hem nissun bon eletricista Che poeu gh'è de dì per carità Che de umanista ghe 'n voeur in ogni società Storegh, poeta, leteraa, lenguista Ma minga tucc voeurom vess di artista El sur Campaltin el dis de toeu via el licee ginnasi Ma mi me par 'na roba de ciochet Anca 'sti scoeul chì gh'hann i sò spazzi Basta fài fà no a tucc quèi che vann al Brovet Che poeu l'è de rid che in Gentilonia A forza de voré tucc fà la scoeula ginnasial Ghe n'hem quindes, boja E i tos sann no 'sa scernì e ghe giren i ball Disi donca, che i sgent studien quell che voeuren Chi el latin, chi i cunt, chi a pizzà el foren Senza Carlin, Patrizzi e fanategh liceal Che suten a fàm cristonà e rugà i ball

In ocasion de la proposta del Sur On. Sen. Matee Salvin, matura classega, de fà su la prima central d'Italia in Bagg (30 de sgiugn 2022)

Gh'è un filosof, un maester e 'n macelar I prim dù disen de no al nuclear Domà 'l pover bechee el dis si, e 'l se sent Perchè lu el paga i bollet de la corrent Se 'l sur Salvin, per 'na voeulta inluminaa El dis de doperà l'atom per salvà el pianeta Ghe riva tut el bell Bagg inversaa E sutarem a brusà carbon senza meta Che poeu, Gesù Cristo e 'l Pader bon Respiren anca lor el vonc e 'l negher Pien de smog che 'l brusa i polmon BPCO se 'l va ben, se 'l va mal, cancher Hann mai vist un CNC e nanca un calibro Ma parlen istess de energia e ne manden al baratro Megawatt? TWh? Gigabyte de watt? Tut istess! Anca per 'sti mat! 'Ndee a cagà! Democrategh domà quand che vorii No per i danee, i storgion o l'autonomia Ma l'è sacher domà quell de l'urani, sì? E intant la moeur de gas, carbon e calder la nosta Lombardia

Bivi in la foresta de la vita (29 de luj 2022)

Bivi in la foresta de la vita In tra la strada del dolor E quella che l'è pussee d'onor Almen pensi, la mort, cita Gh'è malagn assee gram Pien de dolor senza speranza Che lassen l'om senza potenza Domà col mal, la vergogna e la fam Con la vita che la va via, gota per gota Pass per pass, aria per aria Se 'n quajcoss el po sbassà 'sta mota L'è mej che viv 'st'esistenza empia Per di sgent l'è tut el pian del Nost Signor E l'è 'na soa scerna, con oner e onor Ma se po minga obligà tucc a viv in la vita pussee grama E obligà tucc a sofrì, senza lus de vita sana

Del gran passaa de Lombardia e del so gram futur (9 de avost 2022)

Oh nosta Terra Mader d'eroi, poeta e soldaa De gran pensator e scenziaa Te nutrisset nunch 'me ona serra Patria de Bonvesin De Salimben e di Vescont Del Becaria, del Catani Del Carlin Porta Semper granda in rivolta Savia in pas, forta in guerra Giusta in cort, dura in lota Che gran orgoeuj 'sta Terra Fium de gran pensee E lagh de gran idee Montagn d'invenzion E cità de creazzion Fada su del sangu di marter Di lagrim di paisan e magut Ciapada de tancc forester Tant che incoeu el doman l'è brut La cros rossa d'arsgent l'è voramai bianca I pianur ch'inn pu verd, nanca De verd gh'è domà la bandera E 'l nost cunt a Roma, Lombardia presonera! Nassuda leonessa, moruda gatina De rusgì a l'Imperi Todesch intregh A cascià per Roma 'na ratina E fà rid tut el mond intregh De maraveja del mond sciora de ogni roba A Roma cinghialona che ne roba E nunch, servitor de soa antiga gloria Menom inanz i cadenn al noster boja

In su l'Italia (10 de otover 2022)

Sura maestra la m'ha domandaa De parlà de la storia di italian e de cuntà E cossa dì pussee che l'è 'na comedia Anzi cossa disi a lee, una tragedia! Prima hann ciapaa la Lombardia E hann tacaa a lomentàss: tropa scioraria Badanai tant 'me i sgiudee e semper a pensà al profit Che hann menad el virus de la China e fann pagà tant de fit Poeu hann partii l'Emilia de Lombardia Per havégh pussee de lomentàss Tucc a fà el tecnegh e no el licee de filosofia Anca lor lavoren trop, foeura che Bologna, comunistass... Poeu hann ciapaa el Veneto, e ciar ghe pias nanca quell Magnen trop pess, ris e fina el buell Parlen la soa lengua inveci de quella del Manzon Come se lor fussen minga i so padron! Poeu Roma e tut quell che gh'è tacaa Voreven l'Imperi pien de gloria e la soa capital final S'inn trovad pien de bordei, malfà e 'n quaj cingial E infin domà a tucc gh'ha robaa Poeu hann ciapad el Regn Borbonegh 'sti Savoja Gh'hann mituu la naja e inn deventaa i so boja Lor piasen no perchè viven de sussidi e criminalità Poeu nissun che insubiss pussee che 'n concors in la sanità. Sicilian, napolitan, salernitan, De l'Etna al Vesuvion Ja ciamen tucc teron Disen ch'inn fradei 'l prim del mes, parassita in di àlter setiman Poeu hann mandaa a morì mez milion de fioeul Per ciapà Triest e 'l Tirol E ghe va no bén che parlen el so tognin E per lor ghe pensarà el Giorgg de la strada del Vin Ma Uscioria dess ghe l'hann su fina coi sardegnoeu Che 'sto paes malnat l'hann faa soeu Voeuren daner e insularità E ciollen pegor con regolarità Sangu, carna, lagrem e piomb Pien de debit e de cadaver in di tomb Per fà su 'sto stat del menga ch'al fonziona no E che tuta Europa ghe rid adree, ier e mo E quella chi l'è l'Italia sciora maestra La vinc domà a tradì o a andà coi potenton Anca se gh'hann i barbis e inn amis del Pelaton E incoeu domà debit, tass e mafia ne resta

Filastroca canzonatoria in su l'elezzion del La Russa a la Presidenza del Senad (15 de otover 2022)

Hoo vist el scior La Russa President del Senad quell de desnoeuv Con la camisa negra e 'l fez che 'l magna quindes oeuv Che 'l pica la sgent rossa Cont un tarell de legn bell negher I pica fort fortent e in vis l'è propi allegher Hoo vist el senator la Russa Avocaton de Milan ma d'origin sicilian El l'hoo vist cont un gross tarell in man El pica in su la porta, fort el bussa Dent gh'è i comunista, malnat e culaton Gh'è de vegnì dent per picài cont el baston! El torna a cà de Roma apen finii la messa El fa la gafa in strada coi volontari de Milizzia El pica cul alegher per tut Porta Venezzia Ghe voeur camisa negra per fermà ogni rissa Per fortuna gh'è lu, digiamo una maccieta Che 'l pica i soversiv menter che 'l lesg la Gazeta E se domà in pista voeurom vedé bandera rossa E dàgh l'oeuli de ricin a tucc 'sti maranza Ghe voeur lu President Sire, in tuta soa potenza Mi son l'Enrico Letta e scrivi de 'na cassa Per dìv che l'è tornaa el maester de Romagna E con lu gh'è i bot per ogni vosta lagna

Adess in Cinghialonia s'inn inventaa (20 de otover 2022)

Che adess in Cinghialonia s'inn inventaa Che vun el po pu andà a fàss un capucin dopo 'l disnà Che ghe rughen i ball ai turista se domanden cafè e lacc E che cunten su ai forestee di rob de macc Mi vivi in Milan e capissi no quell rebellot, a vess sinzer Podi capì no bevél con la pizza o col vin negher Ma 'me merenda o per parlà a 'n mitingh de lavor El me par bon a tucc i or El dis el scior del cafè in su l'Internet Che l'è perchè i italian el latosi tolleren poch E se 'l beven tardi tachen su scorgensge e pet Ma de la nosta banda di Penit anca se 'l bevon cagom no a toch Un quajvun el toca el me sacher cafè a mità Che l'è ve 'l prometi debon una bontà Ma in general cunten ai turista de ordenà no el capucin E de schivà dopo i 11 el laccin "In Italia così si fa" disen e 'l se sent in tuta l'aja E a bon cunt mì l'hoo semper dii che la Lombardia l'è no Italia Perché chinscì che l'è capucin, marochin o cafè a mità Te 'l fann prima, dopo o anca al disnà.

Ona ciollada (6 de november 2022)

Voo in la camara tut biot Col cotal bell longh e in tir Tornaa de 'na birra al grot E hoo menaa a cà 'na tosa trovada in gir Ghe voo dent a la soa natura A sperà che tant el me ciolla 'l dura Vegnom insema, mi in del goldon Lee in sul lecc, oh Signor, debon? Tacom a vestìss, ma lee la gh'ha ancamò voeuja Mi ghe la lapi e la fa i vers de 'na roja! Finissom e lee la se quata cont una foeuja E la dis: una bella ciollada, el grot no imbroeuja

El me bar che voraria (8 de november 2022)

Se fussi un zich pussee scior Dervaria un bar, de sigur A fà cafè, tè, lacc, dolz, tort e mangià Colazzion, marenda e disnà Ciaparia i gran pussee bon che ghe sia Per masnài e fài con gran maestria Moka, cogoma, stantuf e espress E pò filter, pignatin e AeroPress Poeu ofell, tortin, delizzi al cicolat Roba moderna e de la tradizzion Se vorii? Cafè, pan de mej, panera e lat Per la vosta gran bella colazzion? Al matin cafè, capucit e gius per i fiolit Magara anca 'na briosc per di poverit Poeu la sira vin, birra, alcol e cochtel Speri no gomit, pugn e rivoltell

La bloeu (27 de november 2022)

Incoeu l'hoo ciapaa Per provàll 'sto metrò Ghe l'hann fada! L'è bloeu El tacarà 'l reoport a la cità E 'me l'è la 'sta linia bloeu? L'è tant 'me quella veggia Ma l'è pussee granda e poeu? Per adess la riva nanca a 'n oreggia A tacà 'l Reoport a Datee Bon per Cità Studi, Repet e 'l Forlanin E chi alter? Quei che ciapen el trenin E ghe va ben de Trenord i cuntee

LA STATUA DEL PORTA EL 19 DE DICEMBER (23 de dicember 2022)

Denanz a la statua del Carlo Porta Poeta Ambrosian Passen omen, don, bagaj e tosann Tancc sann nanca chi l'è che gh'è 'n sul monument E quei che 'l sann, brava gent E in 'sto dì col cel de piomb e scigherent Gh'è du che vann e vegn, bei e content Inn la Greta e 'l sur Brian Una bella cobia de amis padan Lee bella, bionda e piscinina Lu gran, gross e con la barba cavrina S'inn faa mez Milan a caminà Per vedé i grandoeur de la cità De la stazzion al Castell al Brovet Dom, Porta, Cà Granda e Verzee Hann vist bisson e musee Per andà poeu a bev el cafè di forestee Inn andaa fina in d'una libraria de psicologia E poeu a crompà 'n fil per la bataria Me se domandi domà perchè inn passaa denanz a mi Trè, quater, cinch voeult domà in d'un dì!

Messina Denaro (18 de sginer 2023)

L'hann ciapaa 'sto mafioson Intant che l'era dree a fà la terapia El stava de cà in del so rion Ma l'hann vist domà adess, quei del dron in pandemia Polee, giandarma e finanzer per quei che i correva Domà speccià per quei che in l'acid i fioeu i desligava Poeu con cura e umanità l'hann portaa in la soa cella Quand che 'n gnaro col storggion el po morì 'n su la scala Mez'armada per i vegget che 'naven in sgir col scur E quest chi el faseva la vita de sur El stat leon con quei che faseven la soa vita E pegora bona cont el dus de la malavita Mi son content che 'l va al camuscion Sassin, bombaroeu e destrugon Ma vitoria del Stat de cossè, un malaa de cancher 'n om vesin a la soa fin, che 'l voeur cur e l'è senza poder? Vitoria del stat, de l'onestà e di ROS? De 'sto stat che 'l gh'ha pussee contra de mi che contra i boss? Disi mi, ma forsi pensi mal... Vitoria de cossè? La vitoria di mè ball

Mort a l'Italia (26 de sginer 2023)

Mort a l'Italia Semper mort a lee Paes de cioch, giavan e badee Piena de debit fina al coll Ma pien de sgent che la speta 'l roeull Professor, maester, fanigoton bidell Minga el stival ma i cojon d'Europa Tut quell che se fa in 'sto diavol de continent El va ben domà se ghe riva i danee bei bellent La soa scoeula l'è merda ma 'n volii pussee Tucc obligatori, de l'asili a la matura Poeu vegnen foeura senza nanca 'na coltura Milan el costa 'me la Svezzia e Palermo 'me Tirana? Parlee no de autonomia o salari locai Sedenò tachen con la bojada che sem tucc eguai La sanità 'n poo l'è salva per region e privaa Ma ghe va no ben! Voeulen tut publegh e al stat Tant 'me a Cuba, e in crosera gh'e i rat Quand che sarii in fila per el pan denanz a la piev Per fà andà tut ben cantarii l'inn del Piav Per fà finta che 'l vost futur el sarà minga scancellaa Cantee Fradei d'Italia me se recomandi Quand che denanz a vialter ghe sarà anca la Romania E sarii boni de dì ancamò de dà 'na colpa a la Lombardia Sii di pures, zech e pioeugg Che volii no che se dem on bell netà Tuscoss l'è pussee mej che l'italianità

Festa di alpin (28 de sginer 2023)

Viva i Alpin e 'l so coragg Gloria per tut quell ch'hann facc Anca se lotaven per el Tognin e per el spazzi de vita del Barbisin Gloria a l'Armada, i noster bellee Fa nient per tucc i mort, per i sgiudee Viva l'Italia, italian brava sgent Disiil in Grecia, Jugoslavia e apò sora Trent Fii pur el dì de la memoria ma cossa 'l serv? Se 'l dì prima regordee l'Hitler e i so serv? Ne cuntee di sgiudee i camp ertegh Poeu quatee de ipocrisia i svastegh

TIR: Terons In Revolution (7 de fevrer 2023)

In Bassitalia gh'è pronta la revoluzzion Contra chi? Contra i mafios, contra i trason? No, la minee! Contra l'autonomia Del Veneto e de la Lombardia El Matee Messina Danee? Figureves, l'è domà 'n badee El Tilio Fontana che 'l voeur pussee de competenz? L'è el pussee gram, pien de fetenz I politegh clientelista che se crompen i vot? Va beh, poca roba, sota sot Ospedai de merda e scoeul an'mò pesg? Va beh, un quajvun che ghe dà lavorà 'l i elesg Ma no, sciori mè, el so problema sem num Perchè se fem depernum, pôm! Senza stat chi ghe paga i clientell? Chi ghe sostegn el so sistema inscì bell Ma votee, asen lombard, per i partii del tricolor Che ve parlen di "nost fradei" Che ve ciamen la locomotiva che per tucc la corr E poeu apena se fermom tiren foeura i cortei

Al Tilio Fontana servitor de Roma (10 de fevrer 2023)

Al Tilio Fontana servitor de Roma Che se 'l barbis bianch el riva a dì 'na roba bona El gh'ha de andà a umiliàss a Canossa E dì che la Lombardia i calabris l'hann fada grossa Fa nient che per el Catani serom i pussee sciori de l'Imperi E tucc i lengov che lombard l'è sinonem de bancheri E l'è nanca che gh'hem daa, a stringés, 'n oportunità Lor n'hann menaa scioraria e civiltà Ma donca te seet el noster president O el prefet de Roma in tra i noster sgent? Perchè te gh'hee de cuntà su 'sti ball Che al noster popol fann pussee che mal Ma cossa podom spetàss de quell che 'l gh'ha corasg De domandà l'autonomia senza nanca i gasg Ma un quajvun l'ha votaa 'sto servitoron Chi è-l staa? I lombard, asen cojon

Mangià italian (14 de marz 2023)

Pizza, carbonara, naranzin e pastera Inn roba bona che mangi volentera Ma 'l me bisnono nanca saveva cossa i era Perchè l'era no roba de la soa Gera Mi magni tusscoss: sushi, pizza, fina i tarai Di voeulte i crompi, di voeulte l'è bei fài Però capissi no quèi che fann i taleban Per del mangià che magara l'hann inventaa l'alt'r ann! Carbonara con panera? Pizza con l'ananass? El problema indova l'è, se 'l ghe pias? Cossa l'è, ased e tomates, el ketchup? Ma no in la pasta? 'ndee a dà vià i ciap! Poeu gh'è de mocalla con la storia de la dieta del Mediterrani Orgoeuj italian, ma mangiom nò inscì, num padani! 'sa l'è tuta quella roba lì in l'oeuli bujent? Che num magnom pussee vari polent

AL SUR DE LUCA (28 de avril 2023)

Al sur De Luca capo di Campan Che ne ruga i ball in sul mangià padan Che 'l saria indree al temp de la preja Domà lor inn boni de mangià, l'è la soa ideja È-l lu mai staa scià in Vall Padana? Mai sintuu parlà del formai Grana? O del giambon? Sciat? Tortellin? La piada? Lasagn e mondeghin? Polenta e osei? Tut i noster ris? Sgiald, ross, bianch o cont i bis? El sa un quajcoss de la nosta mensa, O 'l parla domà per dì quell che 'l pensa? El sarà bon tuscoss in l'oeuli, che bell! Che poeu 'l va inanz con la storia de l'union patrìa Tant 'me 'n novell Vitori Emanuell Che però el sa nanca cossa magnom in Lombardia

Considerazzion del Sur Sotascrit, forsi perit industrial, denanz al grandoeur del Gonfalon del Comun de Milan (29 de avril 2023)

Inanz al noster gonfalon Pien de storia e de gloria, 'me l'è grand! Chi el scerniss el tricolor e no el Sant O che l'è mat, o che l'è cojon

In gir (11 de sgiugn 2023)

Ma va che bell minin Che hoo menaa pel mè Milan Al Musee Natural e poeu al giardin In su 'na panchina coi biccerin in man Hem bevuu 'l noster spriss Per rid e scherzà in sui biss Se sem brasciaa su, tancc de basit Bei paroll. carezz e toch in sui oreggit Saroo minga stilnovista che scrivi in lengua s'ceta Ma mi me pias stà con tì, bella capelleta Anca a mangià un sanguiss de carna tria E parlà poeu di provincc de la Lombardia

Lengua lombarda (11 november 2023)

Lengua sciora, fada pora Incoeu voncia, de coeur pura Bordegada, desmentegada La radis de la terra lombarda L'è gran fluta, l'è una piva Del master De La Riva Poeu al Porta, al Belot Ma gh'è stad un quarantot L'era lengua de tucc i savè Di bone manere al Belcalzer Ma el Meneghin l'è stad no assee E adess la parlen nanca al Verzer E 'l scriveva sgiamò el Biragh De la boria ds lor Toscan Boni fradei de l'Abaa Giavan Che ghe fa schivi 'l nost parlàgh Per i dotoron de 'sta sort nanca la gh'è "Tropa diversa", quest chi el cuntee L'è nanca vera, ciciarom senza problema L'è forsi che ghe fa tropa de tema? Se 'l nost idioma voeulom guarnà Se i noeust coeur i fem parlà Vegnen a dìnn che l'è malfà Anca a cagà su la verità Che la droeuvom, con la penna Con la vos o in d'una scena O se troeuvom al coll la cadena Con la lengua che va in cancrena Che la parlom 'me i omenon O 'me la cademia di Busecon Basta che parlom la lengua de bon O magnarem crusca 'me di cojon

AL LETOR IN LA GESA DI LUSERT EL DÌ 12 OTOVER 2024 (12 de otover 2024)

Al letor del liber del profeta Isaia El sur coordenador GLAM Lombardia che l'era vegnuu a la celebrazzion de l'Eucaristia Per vedè l'oratori, fà contat e sentì la liturgia In la Gesa di Lusert, cont el pret tolt in ficc L'era dree a parlà con la sciora presidenta E 'l curaa senza nanca la pianeta El suplega: "vergun che 'l legg i test vigg!" E lu denanz al scior Curaa del Giambellin El po domà dì sì, che 'l lensgiarà che con la Parolla el coeur el dervirà a tucc i bon present e ai lusertin E inscì senza nanca la benedizzion cont i bragh de baloss e la felpa cont un bus el lesg el Verb, con calma e bona dizzion De colù che l'ha preveduu el Nost Esuss Infin torna a setàss in tra i fedee Col pret che 'l domanda de volzà la man Se se voeur toeu el Corp del Domendè e de volzàss no, inscì che veden quei lontan "Tolì e mangudà", el dis e 'l mostra el Pan "Tolì e bevì", e 'l mostra el calis del Vin In genoeugg el se met, per onor san ma per poch el se s'cepa no l'altarin "Che andee in pas", e inscì la messa l'è Ghe dann un liber per dìgh gramarzè E gh'è de dìgh che senza preparazzion L'è staa pussee bon che cojon!

El bus del cu (30 de november 2024)

Bus del cu, uss de l'om Merda foeu, dent nagot Anca se ghe pias, a om e don La pena eterna? La cità de Lot

Carn'al foeugh (6 de dicember 2024)

Quand che risia carna, alma e cervell In tra l'amor de coeur e la lussuria El corp el voeur che se va a fà el bell El spirit el voeur la comenion pussee pia Sem faa de carna che la voeur ciollà Ma anca de coo, che 'l proeuva a resonà E de spirit, che vun con l'altra ne voeur fà deventà Mi son mia teolegh, domà catolegh, apostolegh e roman Soo domà che sborrà senza deventà domà una carna L'è domà svujass i ball, e 'l svuja omen e tosann La carna l'è debol, el cervell l'è baloss El spirit l'è fort, e 'l perdon del Signor l'è gross E se 'l bigol ne mena in di sit pussee gram che se po Gh'è semper quajcoss che a dis, sott vos, "no, insì no!"